“மாற்றுத் திறனாளிகளுக்கான உதவித்தொகை 3 மாதமாக நிலுவை – உடனடியாக வழங்கக்கோரி எடப்பாடி பழனிசாமி வலியுறுத்தல்!”

மாற்றுத் திறனாளிகளுக்கான மாதாந்திர உதவித்தொகை கடந்த 3 மாதங்களாக வழங்கப்படவில்லை எனும் தகவல் அதிர்ச்சியை ஏற்படுத்தியுள்ளது. திமுக அரசு நிதி நிலையை காரணம் காட்டி, மாற்றுத் திறனாளிகளுக்கு வழங்க வேண்டிய உதவித்தொகையை நிறுத்தியுள்ளதை கண்டித்து, அதிமுக பொதுச்செயலாளர் எடப்பாடி பழனிசாமி கடும் கண்டனம் தெரிவித்தார்.

இதுகுறித்து அவர் தனது எக்ஸ் தள பதிவில் கூறியதாவது: “மாற்றுத் திறனாளிகள் உதவித்தொகை கிடைக்காமல் 3 மாதங்களாக தவிக்கின்றனர். கருணாநிதி பெயரில் இசிஆர் சாலையில் அரங்கம் கட்டுவதற்கு நிதி இருக்கிறது, ஆனால் மாற்றுத் திறனாளிகளுக்கு உதவித்தொகை வழங்குவதற்கு இல்லை. இது மிகுந்த அநீதியான செயல். தன்னுடைய நிர்வாகத் திறமையின்மையை மறைக்க, மு.க.ஸ்டாலின் மாடல் அரசு நிதி நிலையை  காரணம் காட்டி மாற்றுத் திறனாளிகளை வஞ்சிக்கிறது. இதனை கடுமையாக கண்டிக்கிறேன்” என்று தெரிவித்தார்.

மேலும், மாற்றுத் திறனாளிகளின் நலனைக் கருத்தில் கொண்டு, உடனடியாக நிலுவையில் உள்ள உதவித்தொகையை வழங்க வேண்டும் என்றும், இதுபோன்ற தாமதம் இனி ஏற்படக்கூடாது என்றும் எடப்பாடி பழனிசாமி வலியுறுத்தினார். மாதந்தோறும் மாற்றுத் திறனாளிகள் எதிர்பார்க்கும் இந்த உதவித் தொகை தாமதமானால், அவர்கள் எதிர்கொள்ளும் வாழ்க்கை சிக்கல்களுக்கு அரசு முழுப்பொறுப்பு ஏற்க வேண்டியதுதான்.

தமிழ்நாட்டில் மாற்றுத் திறனாளிகள் எண்ணிக்கையில் ஒரு முக்கியமான மாநிலமாக உள்ள நிலையில், அவர்கள் வாழ்வாதாரத்திற்குத் தேவையான உதவிகளை அரசு சரியான நேரத்தில் வழங்க வேண்டும் என்பதே பொதுமக்களின் எதிர்பார்ப்பு. இதற்கு அரசாங்கம் உடனடியாக பதிலளிக்க வேண்டும் என சமூக ஆர்வலர்களும் கோரிக்கை விடுத்துள்ளனர்.