“சந்திரயான்-3 தரையிறங்கிய ‘சிவசக்தி புள்ளி’ – 370 கோடி ஆண்டுகள் பழமையானது என இஸ்ரோ அதிர்ச்சி தகவல்!”

இஸ்ரோவின் சந்திரயான்-3 விண்கலம் நிலவில் தரையிறங்கிய பகுதியில் மேற்கொள்ளப்பட்ட ஆய்வில், அப்பகுதியின் வயது குறித்து முக்கியமான தகவல் வெளியாகியுள்ளது. இஸ்ரோ விஞ்ஞானிகள் மேற்கொண்ட ஆய்வின் மூலம், சந்திரயான்-3 தரையிறங்கிய இடம் சுமார் 370 கோடி (3.7 பில்லியன்) ஆண்டுகள் பழமையானது என்பதும் உறுதியாகியுள்ளது.

பூமியில் முதன்முதலாக நுண்ணுயிர்கள் தோன்றியது 370 கோடி ஆண்டுகளுக்கு முன்பு என விஞ்ஞானிகள் ஏற்கெனவே கண்டறிந்துள்ளனர். இந்த புதிய தகவல் நிலவுக்கும் பூமிக்குமான வரலாற்று தொடர்பு குறித்து ஒரு புதிய பார்வையை வழங்குகிறது. பூமியின் உருவாக்கமும், அதன் தொடர்ச்சியான பரிணாம வளர்ச்சியும் நிலவின் புவியியல் வரலாற்றுடன் எப்படி சம்பந்தப்பட்டுள்ளன என்பதை புரிந்து கொள்ள இது உதவக்கூடும்.

2023 ஆம் ஆண்டு ஆகஸ்ட் 23ம் தேதி, இஸ்ரோ விஞ்ஞானிகள் சந்திரயான்-3 விண்கலத்தை நிலவின் தென் துருவத்தில் வெற்றிகரமாக நிலைநிறுத்தினர். இந்த சாதனையின் மூலம், நிலவின் தென் துருவத்தில் வெற்றிகரமாக ஒரு விண்கலத்தை தரையிறக்கிய முதல் நாடு என்ற பெருமையை இந்தியா பெற்றது. இதன்மூலம் அமெரிக்கா, சோவியத் யூனியன் மற்றும் சீனாவுக்கு அடுத்தபடியாக, நிலவில் ஒரு விண்கலத்தை வெற்றிகரமாக தரையிறக்கிய நாடாகவும் இந்தியா அறியப்பட்டது.

சந்திரயான்-3 விண்கலம் தரையிறங்கிய இடத்திற்கு, பிரதமர் நரேந்திர மோடி “சிவசக்தி புள்ளி” என பெயரிட்டார். இப்போது, அந்த இடம் 370 கோடி ஆண்டுகள் பழமையானது என்பதும் உறுதியாகியுள்ளது. இந்த தகவல் நிலவின் பரிணாம வளர்ச்சி மற்றும் அதன் அடிப்படையான உருவாக்கத்தின் காலக்கணக்கை புரிந்துகொள்வதில் முக்கியமான ஒளியினை பரப்புகிறது.

2016 ஆம் ஆண்டு ‘நேச்சர்’ (Nature) இதழில் வெளியான ஓர் ஆய்வின்படி, கிரீன்லாந்தில் கண்டெடுக்கப்பட்ட ஒற்றைச் செல் நுண்ணுயிரிகளின் புதைபடிம எச்சங்களை ஆய்வு செய்ததில், அவை 370 கோடி ஆண்டுகள் பழமையானவை என்று கண்டறியப்பட்டது. இதுதான் பூமியில் தோன்றிய உயிரினங்களுள் மிக பழமையானதாக கருதப்படுகிறது. இப்போது, நிலவில் உள்ள பகுதிகளும் இதே காலக்கட்டத்தில் தோன்றியது என்பதால், பூமியுடன் நிலவு இணைந்துள்ளதற்கான புதிய அறிகுறிகள் கிடைத்துள்ளதாக விஞ்ஞானிகள் கருதுகின்றனர்.

இஸ்ரோவின் முன்னாள் விஞ்ஞானி மயில்சாமி அண்ணாதுரை இந்த கண்டுபிடிப்பு குறித்து பேசும் போது, “பூமியுடன் நிலவு எவ்வளவு நெருக்கமாக உள்ளது என்பதை அறிய இந்த கண்டுபிடிப்பு மிக முக்கியமானதாக உள்ளது,” என தெரிவித்தார். மேலும், “நிலவின் தென் துருவத்தில் தரையிறங்கியதே மிகப்பெரும் சாதனைதான். தற்போது அமைவிட ரீதியில் அப்பகுதி மிகப் பழமையானது என கண்டறியப்பட்டுள்ளது. இது, நிலவின் உருவாக்கம், அதன் புவியியல் மற்றும் பூமியுடனான அதன் தொடர்பை மேலும் விளக்க உதவும்,” என்றும் அவர் கூறினார்.

இந்த ஆய்வு, நிலவின் வரலாற்றை மேலும் புரிந்துகொள்வதற்கு மட்டுமல்லாமல், அங்கு எந்த வகையான கனிமங்கள் இருக்கலாம், அந்த இடம் எந்த காலத்தில் உருவானது, நிலவில் நீர் இருப்பதற்கான சாத்தியக்கூறுகள் என்ன என்பவற்றையும் ஆராய்வதற்கான ஒரு புதிய வாய்ப்பாக அமைகிறது. சந்திரயான்-3 தனது வெற்றிகரமான தரையிறக்கத்திற்குப் பிறகு, வெறும் 13 நாட்களில் பல முக்கியமான தகவல்களை விஞ்ஞானிகள் முன்னிலையில் கொண்டுவந்துள்ளது. அதன் மூலம், நிலவில் நீர் இருப்பதற்கான ஆதாரங்களை இஸ்ரோ கண்டுபிடித்திருப்பது முக்கியமான ஒன்று.

இந்த ஆய்வின் மூலம், நிலவின் பரிணாம வளர்ச்சி, பூமியுடனான அதன் தொடர்பு, மற்றும் எதிர்கால சந்திர ஆய்வுகளுக்கான புதிய பாதைகள் குறித்து விஞ்ஞானிகளுக்கு தெளிவாகும் என்று கருதப்படுகிறது.