“அதிமுகவின் அதிரடி கட்டுமானம்! புதுடெல்லியில் ‘எம்.ஜி.ஆர் – அம்மா மாளிகை’ புதிய அலுவலகம் திறப்பு!”

அதிமுகவின் புதிதாகக் கட்டப்பட்ட புதுடெல்லி கட்சி அலுவலகமான “எம்.ஜி.ஆர். – அம்மா மாளிகை” இன்று காணொளிக் காட்சி மூலம் திறந்து வைக்கப்பட்டது.

அதிமுக பொதுச் செயலாளரும், சட்டமன்ற எதிர்க்கட்சித் தலைவரும், தமிழகத்தின் முன்னாள் முதலமைச்சருமான எடப்பாடி பழனிசாமி, சென்னை தலைமைக் கட்சி அலுவலகமான எம்.ஜி.ஆர். மாளிகையில் இருந்து காணொளிக் காட்சி மூலம் இந்த அலுவலகத்தை திறந்து வைத்தார்.

இந்த நிகழ்வில், தலைமைக் கட்சிச் செயலாளர்கள், மாவட்டக் கட்சிச் செயலாளர்கள், சட்டமன்ற உறுப்பினர்கள், கட்சி சார்பு அணிகளின் துணை நிர்வாகிகள், முன்னாள் அமைச்சர்கள், முன்னாள் நாடாளுமன்ற மற்றும் சட்டமன்ற உறுப்பினர்கள், கட்சியில் பல்வேறு நிலைகளில் பணியாற்றும் நிர்வாகிகள் மற்றும் தொண்டர்கள் பெரும் திரளாக கலந்து கொண்டனர்.

இந்த புதுடெல்லி கட்சி அலுவலகம், “எம்.ஜி.ஆர். – அம்மா மாளிகை”, புதுடெல்லி, எம்.பி. ரோடு, இன்ஸ்டிட்யூஷனல் ஏரியா, புஷ்ப் விஹார், செக்டார் – 6, பிளாட் எண்கள். 15 & 22 என்ற முகவரியில் அமைந்துள்ளது.

இந்த அலுவலகம் அமைக்கப்பட்ட பின்னணி பற்றி விவரிக்கப்பட்டது. புரட்சித் தலைவி ஜெயலலிதா, 2012 ஆம் ஆண்டு பிப்ரவரி 21 அன்று, 10,850 சதுர அடி கொண்ட இந்த இடத்தை மத்திய அரசிடமிருந்து ஒப்பந்தத்தின் மூலம் பெற்றார். அதன் பிறகு, 2015 ஆம் ஆண்டு அக்டோபர் 5 அன்று, புதிய அலுவலக கட்டிடம் அமைக்கும் பணிகள் தொடங்கப்பட்டன.

சுமார் 10 கோடி ரூபாய் மதிப்பீட்டில் கட்டப்பட்ட 13,020 சதுர அடியில் பரப்பளவைக் கொண்ட இந்த அலுவலகம் தரைத் தளம், முதல் மாடி, இரண்டாவது மாடி, மூன்றாவது மாடி என மொத்தம் நான்கு தளங்களைக் கொண்டு உருவாக்கப்பட்டுள்ளது.

புதுடெல்லியில் நடைபெற்ற “எம்.ஜி.ஆர். – அம்மா மாளிகை” கட்சி அலுவலக திறப்பு விழா நிகழ்ச்சியில், தலைமைக் கட்சிச் செயலாளர்கள், நாடாளுமன்ற உறுப்பினர்கள், முன்னாள் நாடாளுமன்ற உறுப்பினர்கள், புதுடெல்லி மாநிலக் கட்சி நிர்வாகிகள் மற்றும் தொண்டர்கள் திரளாக கலந்து கொண்டு சிறப்பித்தனர்.

இந்த புதிய கட்சி அலுவலகம், அதிமுகவின் தேசிய அளவிலான செயல்பாடுகளை மேலும் வலுப்படுத்தும் முக்கிய கட்டமாக அமையும் என்று கட்சி நிர்வாகிகள் தெரிவித்தனர்.